मेचीनगर। लैङ्गिक हिंसा रोकथाम तथा प्रतिकार्यका लागि एकीकृत सेवा पहुँच (IGBVRN) परियोजना अन्तर्गत मेचीनगरमा विशेष अभिमुखीकरण कार्यक्रम आयोजना गरिएको छ।
मेचीनगर नगरपालिका, महिला, बालबालिका, ज्येष्ठ नागरिक तथा सामाजिक सुरक्षा शाखाको आयोजनामा आमा समूहका सदस्यहरू र मेलमिलापकर्ताहरूका लागि 'लैङ्गिक हिंसा, प्रभावित केन्द्रित दृष्टिकोण र मनोसामाजिक प्राथमिक उपचार' सम्बन्धी अभिमुखीकरण कार्यक्रम सम्पन्न भएको हो।
नगरपालिकाको सभाहलमा आयोजित उक्त कार्यक्रममा लैङ्गिक हिंसाका घटनाहरूलाई कसरी रोकथाम गर्ने, प्रभावित व्यक्तिहरूलाई केन्द्रमा राखेर सेवा तथा सहयोग कसरी पुर्याउने र प्रभावितहरूका लागि मनोसामाजिक प्राथमिक उपचारको महत्त्वबारे जानकारी गराइएको थियो।
कार्यक्रममा स्थानीय आमा समूहका प्रतिनिधि, मेलमिलापकर्ता तथा सरोकारवालाहरूको उपस्थिति रहेको थियो।
