सोमवार , आश्विन १९, २०८३
धरान, १९ असोज – खेलकुद मञ्च धरानको आयोजनामा सम्पन्न ‘तेस्रो धरान स्पोर्टस् अवार्ड’ मा खेलकुद पत्रकारिता र खेल प्रतिभातर्फ उत्कृष्ट योगदान पुर्याएका व्यक्तित्वहरू सम्मानित तथा पुरस्कृत भएका छन्।
धरानमा आयोजित एक भव्य समारोहका बीच कोशीपत्र दैनिकका कार्यकारी सम्पादक गोविन्द बस्नेतलाई खेलकुद पत्रकारिता पुरस्कारबाट सम्मानित गरियो। लामो समयदेखि खेलकुद क्षेत्रको समाचार, विश्लेषण र ओझेलमा परेका खेल प्रतिभाहरूलाई सञ्चार माध्यममार्फत उजागर गर्न पुर्याएको महत्त्वपूर्ण योगदानको कदर गर्दै उहाँलाई यो सम्मान प्रदान गरिएको हो।
त्यसैगरी, खेलकुदतर्फ करातेका राष्ट्रिय खेलाडी निगम तिम्सिना उत्कृष्ट वर्ष खेलाडी अवार्डबाट पुरस्कृत हुनुभएको छ। राष्ट्रिय तथा अन्तर्राष्ट्रिय कराते प्रतियोगिताहरूमा उत्कृष्ट प्रदर्शन गर्दै क्षेत्र र देशको नाम उच्च राख्न सफल भएकाले तिम्सिनालाई सो अवार्ड प्रदान गरिएको आयोजक समितिले जनाएको छ।
समारोहमा खेलकुद क्षेत्रका विभिन्न व्यक्तित्व, स्थानीय प्रतिनिधि, समाजसेवी तथा संघ-संस्थाका प्रतिनिधिहरूको बाक्लो उपस्थिति रहेको थियो। कार्यक्रमका वक्ताहरूले खेल क्षेत्रको प्रवर्द्धन, खेलाडीहरूको हौसला अभिवृद्धि र खेल पत्रकारिताको विकासका लागि धरान स्पोर्टस् अवार्डले महत्त्वपूर्ण भूमिका खेलिरहेको बताए।
मञ्चले विगत केही वर्षदेखि पूर्वाञ्चल क्षेत्रको खेलकुद विकासमा क्रियाशील खेलाडी, प्रशिक्षक र खेल पत्रकारहरूलाई प्रोत्साहन स्वरूप यो अवार्ड प्रदान गर्दै आएको छ।
© 2026 All right reserved to onlinedramnist.com
Design & Developed By
